PËR AUTORIZIMET E ADMINISTRATËS SË PËRKOHSHME NË KOSOVË

Përfaqësuesi Special i Sekretarit të Përgjithshëm,

Duke u thirrur në Rezolutën 1244 (1999) të datës 10 qershor 1999 me të cilën Këshilli i Sigurimit të Kombeve të Bashkuara, duke vepruar sipas Kapitullit VII të Kartës së Kombeve të Bashkuara, autorizoi Sekretarin e Përgjithshëm, me ndihmën e organizatave përkatëse ndërkombëtare, për të vendosur një prani ndërkombëtare civile në Kosovë, të njohur si Misioni i Administratës së Përkohshme të Kombeve të Bashkuara në Kosovë (UNMIK), me qëllim të sigurimit të një administrimi të përkohshëm në Kosovë në bazë të mandatit të përcaktuar me rezolutë;

Duke vepruar në përputhje me autorizimin e dhënë me Rezolutën 1244(1999) të Këshillit të Sigurimit të Kombeve të Bashkuara të datës 10 qershor 1999 dhe me qëllim të vendosjes dhe të mbajtjes së administratës së përkohshme në territorin e Kosovës;

Shpall sa vijon:

Neni 1

AUTORIZIMET E ADMINISTRATËS SË PËRKOHSHME

1.1 Gjithë pushteti legjislativ dhe ekzekutiv në lidhje me Kosovën, duke përfshirë administrimin e organeve të drejtësisë, i vishet UNMIK-ut dhe ushtrohet nga Përfaqësuesi Special i Sekretarit të Përgjithshëm.

1.2 Përfaqësuesi Special i Sekretarit të Përgjithshëm mund të emërojë dhe shkarkojë cilindo person për të kryer funksione në administratën civile në Kosovë, duke përfshirë edhe gjyqësinë. Këto funksione kryhen në pajtim me ligjet ekzistuese, ashtu siç përcaktohet në nenin 3 dhe me rregulloret e nxjerra nga UNMIK-u.

Neni 2

RESPEKTIMI I STANDARDEVE TË PRANUARA NDÇRKOMBËTARE

Të gjithë personat që marrin përsipër detyra publike ose mbajnë funksione publike në Kosovë, gjatë ushtrimit të funksioneve të tyre duhet t’i respektojnë standardet e pranuara ndërkombëtare të të drejtave të njeriut dhe të mos diskriminojnë asnjë person për shkak të gjinisë, racës, ngjyrës, gjuhës, fesë, bindjes politike ose bindjeve të tjera, origjinës kombëtare, etnike apo sociale, shoqërimit me një komunitet kombëtar, pasurisë, lindjes ose të ndonjë statusi tjetër.

Neni 3

LIGJI NË FUQI NË KOSOVË

Ligjet e Kosovës të cilat kanë qenë në fuqi në territorin e saj para datës 24 mars 1999 do të vazhdojnë të zbatohen në Kosovë nëse nuk bien në kundërshtim me standardet e përmendura në nenin 2, me përmbushjen e mandatit të dhënë UNMIK-ut me Rezolutën 1244 (1999) të Këshillit të Sigurimit të Kombeve të Bashkuara ose me këtë rregullore a çdo rregullore tjetër të nxjerrë nga UNMIK-u.

Neni 4

RREGULLORET E NXJERRA NGA UNMIK-u

Për kryerjen e detyrave, që i janë besuar administratës së përkohshme me rezolutën 1244 (1999) të Këshillit të Sigurimit të Kombeve të Bashkuara, UNMIK-u, sipas nevojës, nxjerr akte ligjore në formë rregulloresh. Këto rregullore do të mbeten në fuqi derisa të mos shfuqizohen nga UNMIK-u ose të mos zëvendësohen me rregulla të cilat do të nxirren më vonë nga institucionet e themeluara me marrëveshje politike, ashtu siç parashihet në Rezolutën 1244 (1999) të Këshillit të Sigurimit të Kombeve të Bashkuara.

Neni 5

HYRJA NË FUQI DHE SHPALLJA E RREGULLOREVE TË NXJERRA NGA UNMIK-u

5.1 Rregulloret e UNMIK-ut miratohen dhe nënshkruhen nga Përfaqësuesi Special i Sekretarit të Përgjithshëm. Ato hyjnë në fuqi në datën e caktuar në rregullore.

5.2 Rregulloret e UNMIK-ut nxirren në gjuhën shqipe, serbe dhe angleze. Në rastet kur ka divergjenca, vlen vetëm teksti në gjuhën angleze. Rregulloret duhet të botohen në mënyrë të tillë që të sigurohet përhapja e tyre e gjerë me anë të njoftimeve dhe të botimeve publike.

5.3 Rregulloret e UNMIK-ut mbajnë shenjën UNMIK/REG/ të shoqëruara me vitin e nxjerrjes dhe numrin e nxjerrjes së atij viti. Në regjistrin e rregulloreve jepet data e shpalljes, fusha e veprimit dhe ndërrimet në to ose shfuqizimi a pezullimi i tyre.

Neni 6

PRONA SHTETËRORE

UNMIK-u administron pasurinë e tundshme ose të patundshme, duke përfshirë financat, llogaritë bankare dhe format e tjera të pronës të regjistruara në emër të Republikës Federative të Jugosllavisë, të Republikës së Sërbisë apo të cilitdo organ të saj, të cilat gjendet në territorin e Kosovës.

Neni 7

HYRJA NE FUQI

Kjo rregullore konisderohet të ketë hyrë në fuqi më 10 qershor 1999, datë e miratimit të Rezolutës 1244 (1999) nga Këshilli i Sigurimit të Kombeve të Bashkuara.

Dr. Bernard Kouchner,

Përfaqësues Special i Sekretarit të Përgjithshëm