PËR RREGULLIMIN E SHËRBIMEVE TË POSTËS DHE TË TELEKOMUNIKACIONIT NË KOSOVË

Përfaqësuesi Special i Sekretarit të Përgjithshëm,

Duke vepruar në pajtim me autorizimin që i është dhënë me Rezolutën 1244 (1999) të Këshillit të Sigurimit të datës 10 qershor 1999,

Duke marrë parasysh Rregulloren 1999/1 të Misionit të Administatës së Përkohshme të Kombeve të Bashkuara në Kosovë (UNMIK) mbi autoritetin e Administratës së Përkohshme në Kosovë të datës 25 korrik 1999,

Me qëllim të rregullimit të shërbimeve të postës dhe telekomunikacionit në Kosovë,

Shpall sa vijon:

Neni 1

NDËRMARRJA E POSTËS DHE ETELEKOMUNIKACIONIT

1.1 Përkohësisht dhe për aq sa do të zgjasë mandati i UNMIK-ut dhe në varësi të ujdive të tjera të bëra ose që do të bëhen nga Përfaqësuesi Special i Sekretarit të Përgjithshëm, Ndërmarrjes së Postës dhe Telekomunikacionit në territorin e Kosovës (PTK), si person juridik, me këtë rregullore i jepet autorizimi i nevojshëm për të ofruar shërbime postare dhe të telekomunikacionit. PTK me miratimin e Sekretarit të Përgjithshëm të Sekretarit të Përgjithshëm, mund të themelojë persona juridikë ndihmës për të ofruar shërbime të veçanta.

1.2 Me qëllim të ofrimit të shërbimeve postare dhe të telekomunikacionit në përputhje me këtë rregullore, PTK-ja gëzon autoritet që t’i përdorë të gjitha pasuritë ekzistuese postare dhe të telekomunikacionit që gjenden në Kosovë, duke përfshirë edhe çdo zgjerim të tyre në të ardhmen.

1.3 PTK administron dhe përgjigjet për gjithë pasurinë, pajisjet si dhe punonjësit e punësuar prej saj. PTK është përgjegjëse për të gjitha detyrimet lidhur me veprimtarinë e saj.

Neni 2

POLITIKA DHE PRAKTIKA E DREJTIMIT DHE PUNËSIMIT

2.1 PTK zbaton një politikë racionale të punësimit dhe drejtimit me të vetmin qëllim për një rregull dhe administrim të mirë të PTK-së për të garantuar respektimin e detyrimeve që lindin nga kjo rregullore.

2.2 Politika e punësimit të PTK-së përfshin vlerësimin profesional të numrit dhe

llojit të vendeve të punës që nevojiten në secilën nga zyrat e veta si edhe kualifikimet e kërkuara për këto vende pune.

2.3 Në bazë të kontratës, PTK-së i lejohet të angazhojë të gjithë punonjësit që më parë kanë qenë të punësuar në sektorin e postës dhe te telekomunikacionit në Kosovë si edhe punonjës të tjerë. PTK zbaton një politikë jodiskriminuese të punësimit për të garantuar se përbërja e punonjësve të PTK-së do të pasqyrojë karakterin shumetnik të bashkësive të Kosovës.

2.4 PTK mban regjistrime financiare të sakta dhe transparente të të gjitha transaksioneve, të cilat janë subjekt kontrolli periodik nga një ekspert kontabël i caktuar nga UNMIK-u.

Neni 3

FUNKSIONIMI

3.1 Gjatë kryerjes së detyrave që i janë besuar me këtë rregullore, PTK-ja respekton dispozitat e të gjitha rregulloreve dhe urdhresave adminstrative të UNMIK-ut në fuqi.

3.2 Përfaqësuesi Special i Sekretarit të Përgjithshëm formon Këshillin e Përbashkët Civil të Shërbimeve të Postës dhe Telekomunikacionit, nën autoritetin e UNMIK-ut, i cili mbikëqyr punët e PTK-së si dhe cakton parimet e politikës së PTK-së.

3.3 PTK nuk ndërmerr asnjë veprim në drejtim të shërbimeve të postës e telekomunikacionit ndërkombëtar pa miratimin e posaçëm me shkrim të Përfaqësuesit Special të Sekretarit të Përgjithshëm.

Neni 4

ZBATIMI

Përfaqësuesi Special i Sekretarit të Përgjithshëm mund të nxjerrë direktiva dhe urdhra administrative për zbatimin e kësaj rregulloreje.

Neni 5

LEGJISLACIONI NE FUQI

Kjo rregullore shfuqizon çdo dispozitë të legjislacionit në fuqi lidhur me rregullimin e shërbimeve postare dhe të telekomunikacionit që bie në kundërshtim me të.

Neni 6

HYRJA NE FUQI

Kjo rregullore hyn në fuqi më 14 tetor 1999.

Bernard Kouchner,

Përfaqësues Special i Sekretarit të Përgjithshëm