RREGULLORE NR. 2001/10

UNMIK/RREG/2001/10

24 maj 2001

PËR ndalimin e kalimIT të paAutorizuar të kufirit shtetëror/administrativ

Përfaqësuesi Special i Sekretarit të Përgjithshëm,

Në pajtim me autorizimin që i është dhënë me Rezolutën 1244 (1999) të Këshillit të Sigurimit të Kombeve të Bashkuara të datës 10 qershor 1999,

Duke marrë parasysh Rregulloren nr. 1999/1 të datës 25 korrik 1999, të ndryshuar, të Misionit të Administratës së Përkohshme të Kombeve të Bashkuara në Kosovë mbi Autoritetin e Administratës së Përkohshme në Kosovë,

Duke pasur parasysh kërcënimet e vazhdueshme të rendit dhe ligjit civil në Kosovë dhe përreth Kosovës,

Shpall sa vijon:

Neni 1

Përkufizimet

Sipas kësaj rregulloreje:

(a) “kufi administrativ” nënkuptohet vija ndarëse ndërmjet Kosovës dhe Serbisë si dhe ndërmjet Kosovës dhe Malit të Zi;

(b) “kufi shtetëror” nënkuptohet pjesa e kufirit të Kosovës të njohur ndërkombëtarisht ndërmjet Republikës Federale të Jugosllavisë dhe ish-Republikës Jugosllave të Maqedonisë (IRMJ) si dhe ndërmjet Republikës Federale të Jugosllavisë dhe Shqipërisë;

(c) “arma” përkufizohet konform nenit 1(f) të Rregullores së UNMIK-ut nr. 2001/7 të 21 shkurtit 2001 mbi Autorizimin e posedimit të armëve në Kosovë dhe

(ç) “personeli i autorizuar për zbatimin e ligjit” nënkupton praninë ndërkombëtare të sigurisë në Kosovë të njohur si KFOR dhe si Polici Civile të UNMIK-ut.

Neni 2

Caktimi i vendkalimeve të autorizuara të kufirit shtetëror ose administrativ

2.1 Përfaqësuesi Special i Sekretarit të Përgjithshëm, në konsultim me Komandantin e KFOR-it (KOMKFOR) si dhe me Komisarin e Policisë së UNMIK-ut cakton vendkalimet e autorizuara të kufirit shtetëror ose administrativ.

2.2 Caktimi i vendkalimeve të autorizuara të kufirit shtetëror ose administrativ bëhet përmes një urdhërese administrative.

Neni 3

Kalimi i paautorizuar i kufirit shtetëror ose administrativ

3.1 Çdo person që kalon kufirin shtetëror ose kufirin administrativ të Kosovës në çdo vend tjetër që nuk është vendkalim i autorizuar i kufirit shtetëror apo i kufirit administrativ kryen vepër penale dhe i nënshtrohet dënimit me gjobë deri në 500 DM ose me burgim deri në 30 ditë.

3.2 Çdo person që kalon kufirin shtetëror ose kufirin administrativ të Kosovës në cilindo vend tjetër që nuk është vendkalim i autorizuar i kufirit shtetëror apo i kufirit administrativ, në një ose në më shumë rrethana të parashtruara në këtë paragraf, kryen vepër penale dhe i nënshtrohet dënimit me gjobë deri në 5000 DM ose me burgim deri në një vit nëse:

(a) Kryesi i veprës ka qenë i shoqëruar nga një ose më shumë persona të tjerë dhe

(b) Kryesi i veprës ka qenë i shoqëruar nga persona të mitur.

3.3 Çdo person që kalon kufirin shtetëror ose kufirin administrativ të Kosovës në çdo vend tjetër që nuk është vendkalim i autorizuar i kufirit shtetëror apo i kufirit administrativ, në një apo në më shumë rrethana të parashtruara në këtë paragraf, kryen vepër penale dhe i nënshtrohet dënimit me burgim prej 45 ditësh deri në një vit nëse:

(a) Kryesi i veprës ka qenë i dënuar më parë për shkelje të kësaj Rregulloreje;

(b) Gjatë ndalimit, kryesi i veprës ka ikur, ka tentuar të ikë ose i ka rezistuar ndalimit nga ana e personelit të autorizuar për zbatimin e ligjit;

(c) Kalimi është kryer ndërmjet orës 8:00 në mbrëmje dhe orës 6:00 në mëngjes gjatë periudhës prej datës 1 prill deri më 30 shtator, ose ndërmjet orës 6:00 në mbrëmje dhe orës 6:00 në mëngjes gjatë periudhës prej datës 1 tetor deri më 31 mars dhe

(ç) Kryesi i veprës ka qenë në posedim të ndonjë arme, të municionit ose të rrobave, furnizimeve ose pajisjeve ushtarake.

3.4 Asnjë person nuk ndiqet penalisht për shkak të kalimit të kufirit shtetëror ose të kufirit administrativ në ndonjë vendkalim të autorizuar në rast se kalimi është bërë në një postbllok të vendosur nga ana e KOMKFOR-it.

Neni 4

Trajtimi i refugjatëve dhe i të zhvendosurve të vërtetë (bona fide)

4.1 Pavarësisht nga neni 3, asnjë procedurë që ka të bëjë me një vepër të cekur në këtë Rregullore nuk do të ngritet apo të vazhdohet ndaj akëcilit refugjat ose ndaj akëcilit të zhvendosur të vërtetë që vie nga një territor ku i kërcënohet jeta ose liritë themelore të tij/saj me kusht që ai ose ajo t’i jetë paraqitur organeve për zbatimin e ligjit brenda një kohe të arsyeshme dhe paraqet arsyet për kalimin e pikës së vendkalimit kufitar apo vendkalimit të paautorizuar administrativ.

4.2 Asnji refugjati ose të zhvendosuri të vërtetë nuk i refuzohet hyrja në Kosovë apo kthimi nga Kosova në cilindo territor tjetër në rast se si rezultat i veprimit të tillë personi në fjalë është i detyruar të qëndrojë ose të kthehet në territorin ku jeta ose liritë e tij themelore janë të kërcënuara.

Neni 5

Procedurat gjyqësore

5.1 Rregullorja nr. 2000/64 e UNMIK-ut do të zbatohet për procedurat që kanë të bëjnë me veprat e parashtruara në nenin 3 të kësaj Rregulloreje.

5.2 Procedurat gjyqësore do të thjeshtohen ashtu siç janë parashtruar në nenin 430 deri në 466 të Ligjit në fuqi mbi procedurën penale dhe do të shfrytëzohen gjatë ndjekjes penale për veprat e parashtruara në nenin 3 të kësaj Rregulloreje. Gjykata do të shqyrtojë rastet me nguti të posaçme.

5.3 Veprat e parashtruara në nenin 3 të kësaj Rregulloreje do të gjykohen në gjykatën e qarkut të komunës në të cilën është kryer shkelja.

Neni 6

Zbatimi

Përfaqësuesi Special i Sekretarit të Përgjithshëm mund të lëshojë urdhëresë administrative lidhur me implementimin e kësaj Rregulloreje.

Neni 7

Ligji në fuqi

Kjo Rregullore shfuqizon çdo dispozitë të ligjit në fuqi që është në kundërshtim me të.

Neni 8

Hyrja në fuqi

Kjo Rregullore hyn në fuqi një muaj pas nënshkrimit të saj.

Hans Haekkerup

Përfaqësues Special i Sekretarit të Përgjithshëm