RREGULLORE NR. 2001/12

UNMIK/REG/2001/12

14 qershor 2001

MBI NDALIMIN E TERRORIZMIT DHE AKTEVE TJERA TË NGJASHME

Përfaqësuesi Special i Sekretarit të Përgjithshëm,

Në pajtim me autoritetin që i është dhënë sipas Rezolutës 1244 (1999) të Këshillit të Sigurimit të Kombeve të Bashkuara të datës 10 qeshor 1999,

Duke marrë parasysh Rregulloren nr. 1999/1, të ndryshuar, të Misionit të Administratës së Përkohshme të Kombeve të Bashkuara në Kosovë të datës 25 korrik 1999 mbi autorizimet e Administratës së Përkohshme në Kosovë, dhe Rregullorën e UNMIK-ut nr. 1999/24, të ndryshuar, mbi Ligjin e Zbatueshëm në Kosovë,

Me qëllim të krijimit të legjislacionit specifik për ndjekjen dhe dënimin e kryesve të akteve terroriste dhe akteve tjera të ngjashme, duke përfshirë veprat e dhunshme dhe veprat e rrezikshme për jetën e njeriut, që kryhen brenda dhe rreth territorit të Kosovës,

Shpall sa vijon:

Neni 1

Përkufizimet

Për qëllime të kësaj rregulloreje:

(a) “Terrorizëm” do të thotë kryerja e një apo më shumë krimeve të shënuara në vijim, ashtu siç është definuar ne ligjin në fuqi, me qëllim të kërcënimit serioz të rendit publik, për të detyruar një qeveri apo organizatë ndërkombëtare, ose për të frikësuar apo rrezikuar popullatën civile:

(i) vrasja;

(ii) lëndimet serioze trupore;

(iii) marrja peng;

(iv) kidnapimi;

(v) paraburgimi i paligjshëm;

(vi) helmimi i ujit apo ushqimit;

(vii) shkaktimi i rrezikut të përgjithshëm;

(viii) shkatërrimi apo dëmtimi i shërbimeve publike;

(ix) prodhimi apo sigurimi i armëve apo instrumenteve;

(x) posedimi i paligjshëm i armëve apo mjeteve eksploduese;

(xi) rrezikimi i njerëzve të mbrojtur ndërkombëtarisht;

(xii) rrëmbimi i aeroplanëve;

(xiii) rrezikimi i sigurisë së fluturimit të një aeroplani;

(xiv) marrja apo shfrytëzimi i paautorizuar i materialit nuclear, ose

(xv) rrezikimi i sigurisë me anë të materialit nuklear.

(b) “Detyrimi i një qeverie apo organizate ndërkombëtare” nënkupton detyrimin e një qeverie apo organizate ndërkombëtare për të bërë apo për të hequr dorë nga çfarëdo vepër.

(c) “Qeveria apo organizata ndërkombëtare” përfshinë Misionin e Administratës së Përkohshme të Kombeve të Bashkuara në Kosovë (UNMIK), praninë ndërkombëtare të sigurisë në Kosovë (KFOR) dhe institucionet e përkohshme të vetëqeverisjes apo personelin e tyre.

(ç) “Fondet” përfshijnë mjetet e çfarëdo lloji, qoftë materiale apo jomateriale, të tundshme apo të patundshme, sido që të jenë fituar, dhe dokumentet apo instrumentet juridike të çdo forme, duke përfshirë ato elektronike apo digjitale, dëshmia e pronësisë ndaj apo interesimit në mjete të këtilla, duke përfshirë, por duke mos u kufizuar vetëm në kredi bankare, çeka udhëtarësh, çeka bankarë, mandat-pagesa, aksione, letra me vlerë, obligacione, urdhërpagesa dhe letërkredi.

(d) “Baza materiale” përfshinë banesat, vendstrehimet, dokumentacionin apo identifikimin e rrejshëm, shërbimet financiare, objektet, personelin, mjetet e transportit, pajisjet për komunikim dhe mjetet tjera fizike, përveç barnave të nevojshme.

(dh) “Organizata terroriste” nënkupton grupin e dy apo më shumë njerëzve, duke përfshirë grupet e paautorizuara të armatosura dhe grupet paramilitare, qëllimi apo aktiviteti i të cilave është i drejtuar në kryerjen e terrorizmit dhe

(e) “Mbështetja e një organizate terroriste” nënkupton rekrutimin e pjesëtarëve për një organizatë terroriste, fshehja e një organizate terroriste apo pjesëtarëve të saj, pengimi i zbulimit apo kapjes së një organizate terroriste apo pjesëtarëve të saj, ofrimi apo mbledhjja e mjeteve financiare apo materiale me qëllim, dijeni apo arsye të bazuara për të besuar se ato do të shfrytëzohen, tërësisht apo pjesërisht, nga një organizate terroriste.

Neni 2

Kryerja e një akti terrorist

2.1 Çdo person që kryen një akt terrorist dënohet me burgim pas gjykimit në afat prej dhetë (10) deri në njëzet (20) vjet.

2.2 Çdo person që kryen një akt terrorist i cili shkakton vdekje dënohet pas gjykimit me burgim prej dhjetë (10) deri në katërdhetë (40) vjet.

2.3 Çdo person që pregaditet të kryejë një akt terrorist dënohet me burgim prej pesë (5) deri në (10) vjet.

2.4 Çdo person që tenton, nxitë ose ndihmon tjetrin për të kryer një akt terrorist, ose është bashkëpjesëmarrës në kryerjen e një akti terrorist dënohet pas gjykimit sikur ai apo ajo të ketë kryer aktin terrorist, ashtu siç është paraparë me dispozitat përkatëse të Ligjit penal në fuqi.

2.5 Çdo person i cili bashkëpunon me tjetrin në kryerjen e një akti terrorist dënohet pas gjykimit me burgim prej dhjetë (10) deri në pesëmbëdhjetë (15) vjet.

Neni 3

Shkeljet lidhur me kryerjen akteve terroriste

3.1 Çdo person që ka informata të besueshme për planifikimin ose kryerjen e një akti terrorist në kohën kur ka qenë e mundur të parandalohet kryerja e aktit terrorist ose të zvogëlohen pasojat e një akti të tillë, dhe nuk i ka informar menjëherë autoritetet kompetente për zbatimin e ligjit, kryen vepër penale dhe pas gjykimit dënohet me burgim prej gjashtë (6) muajve deri në pesë (5) vjet.

3.2 Çdo person i cili, pas kryerjes së aktit terrorist, i ndihmon kryesit ose bushkëpjesëmarrësit të tij apo të saj duke i ofruar fonde dhe burime tjera materiale, duke ndërmarrë veprime për të penguar zbulimin ose arrestimin e tij apo të saj, ose duke u dhënë çfarëdo ndihme tjetër personave të tillë, dënohet pas gjykimit me burgim prej një (1) deri në dhjetë (10) vjet.

3.3 Personi nuk mban përgjegjësi penale sipas paragrafeve 3.1 ose 3.2 të kësaj rregulloreje nëse ai ose ajo është:

a) Prind ose bashkëshort(e) i/e kryesit apo bashkëpjesëmarrësit të një akti terrorist dhe

b) Fëmijë, vëlla ose motër e kryesit apo bashkëpjesëmarrësit të një akti terrorist dhe është nën moshën tetëmbëdhjetëvjeçare (18).

Neni 4

Aktet e kryera për qëllime terroriste

4.1 Çdo person i cili ofron, kërkon, mbledh ose fsheh fonde apo mjete të tjera materiale me qëllim, dijeni apo bazë të arsyeshme për të besuar se ato do të përdoren tërësisht apo pjesërisht për qëllime terroriste kryen vepër penale dhe pas gjykimit dënohet me burgim prej pesë (5) deri pesëmbëdhjetë (15) vjet.

4.2 Çdo person i cili rekruton një apo më tepër persona për qëllime terroriste, kryen vepër penale dënohet me burgim prej pesë (5) deri në pesëmbëdhjetë (15) vjet.

4.3 Çdo person, i cili për qëllime terroriste siguron ose merr udhëzime apo stërvitet, duke përfshirë ndërtimin, fabrikimin ose përdorimin e armëve, municionit ose eksplozivit, kryen vepër penale dhe dënohet me burgim prej pesë (5) deri pesëmbëdhjetë (15) vjet.

4.4 Çdo person i cili për qëllime terroriste dërgon ose transferon grupe të armatosura, pajisje, eksploziv, armë, municion ose substanca të tjera brenda apo jashtë territorit të Kosovës kryen vepër penale dhe pas gjykimit dënohet me burgim prej dhjetë (10) deri në pesëmbëdhjetë (15) vjet.

Neni 5

Aktet e lidhura me organizatat terroriste

5.1 Çdo person i cili organizon ose udhëheq në çfarëdo niveli një organizatë terroriste kryen vepër penale dhe pas gjykimit dënohet me burgim prej pesë (5) deri pesëmbëdhjetë (15) vjet.

5.2 Çdo person i cili i ofron mbështetje organizatës terroriste kryen vepër penale dhe pas gjykimit dënohet me burgim prej tri (3) deri në dhjetë (10) vjet.

5.3 Çdo person i cili në mënyrë aktive merr pjesë në një organizatë terroriste kryen vepër penale dhe pas gjykimit dënohet me burgim prej një (1) deri në dhjetë (10) vjet.

Neni 6

Zbatimi jashtë territorit

Përveç zbatimit për aktet e kryera në Kosovë, kjo rregullore do të zbatohet edhe për aktet e kryera jashtë territorit të Kosovës kur:

(a) i akuzuari është banor i Kosovës

(b) viktima është banor i Kosovës dhe

(c) kur akti paraqet kërcënim për sigurinë e kosovës ose popullin e saj, në tërësi apo pjesërisht.

Neni 7

Juridiksioni i gjykatës

Gjykata e qarkut, në qarkun në të cilin është kryer vepra apo, nëse vepra nuk është kryer në Kosovë, aty ku i akuzuari është kapur ose dorëzuar, ka kompetencë mbi kundërvajtjet e parashtruara në këtë rregullore.

Neni

Zbatimi

Përfaqësuesi Special i Sekretarit të Përgjithshëm mund të lëshojë urdhëresa administrative për zbatimin e kësaj rregulloreje.

Neni 9

Ligji në fuqi

9.1 Kjo Rregullore shfuqizon çdo dispozitë të ligjit në fuqi që është në kundërshtim me të.

9.2 Me këtë janë shfuqizuar neni 125 mbi Terrorizmin dhe neni 155a mbi Terrorizmin Ndërkombëtar të Ligjit Penal në Fuqi.

Neni 10

Hyrja në fuqi

Kjo Rregullore hyn në fuqi më 14 qershor 2001.

Hans Haekkerup

Përfaqësues Special i Sekretarit të Përgjithshëm