Udhëheqësia

 

Caroline Ziadeh

Përfaqësuese Speciale e Sekretarit të Përgjithshëm (PSSP) dhe Shefe e UNMIK-ut

Caroline Ziadeh u emërua Përfaqësuese Speciale e Sekretarit të Përgjithshëm dhe Shefe e Misionit të Administratës së Përkohshme të Kombeve të Bashkuara në Kosovë (UNMIK) më 19 nëntor 2021.

Duke shërbyer që nga viti 2017 si drejtoreshë e Departamentit të organizatave ndërkombëtare, konferencave dhe shërbimeve kulturore në Ministrinë e punëve të jashtme dhe emigrantëve të Libanit, znj. Ziadeh sjell në këtë pozitë një përvojë gati 30-vjeçare në diplomacinë ndërkombëtare  me njohuri të gjera të Kombeve të Bashkuara, e cila ka udhëhequr delegacionet kombëtare në Kombet e Bashkuara për çështjet e të drejtave të njeriut, agjendën për gratë, paqen dhe sigurinë, si dhe migrimin.

Si ish Zëvendëspërfaqësuese e Përhershme e Libanit në Kombet e Bashkuara në Nju Jork (2006-2017), PSSP Ziadeh ka shërbyer në ambasadën e Libanit në Mbretërinë e Bashkuar (2004-2006), në atë të Belgjikës dhe në Bashkimin Evropian (1994-1999), si dhe në Misionin e Përhershëm të Libanit në Vjenë dhe ambasadat në Austri, Kroaci dhe Sllovaki (1999-2002).

PSSP Ziadeh ka një diplomë baçelor dhe një diplomë master në ekonomi dhe shkenca politike nga Universiteti Libanez, Bejrut, dhe diploma në marrëdhënie ndërkombëtare nga Universiteti Libre de Bruxelles dhe Akademia Diplomatike e Vjenës. Ajo flet rrjedhshëm arabisht, anglisht dhe frëngjisht.

 

Barrie Lynne Freeman

Zëvendëspërfaqësuese Speciale e Sekretarit të Përgjithshëm (ZPSSP)

Barrie Freeman u emërua Zëvendëspërfaqësuese Speciale për Misionin e Administratës së Përkohshme të Kombeve të Bashkuara në Kosovë (UNMIK) më 22 dhjetor 2020. Deri në emërimin e saj, ajo kishte shërbyer si drejtoreshë politike dhe zëvendësshefe e Zyrës për mbështetjen e ndërtimit të paqes (ZMNP) në Departamentin e çështjeve politike dhe ndërtimit të paqes (DÇPNP) të Kombeve të Bashkuara që nga janari 2018.

Zonja Freeman ishte shefe e stafit, dhe para kësaj drejtoreshë e çështjeve politike, e Misionit të Kombeve të Bashkuara për stabilizimin e integruar shumëdimensional në Republikën e Afrikës Qendrore (MINUSCA) nga viti 2014 deri në vitin 2017. Përpara se t'u bashkohej Kombeve të Bashkuara, znj. Freeman shërbeu si drejtoreshë për Afrika e Veriut me Institutin Demokratik Kombëtar (IDK) nga viti 2011 deri në vitin 2014, duke mbikëqyrur një gamë të gjerë programesh të zhvillimit politik që përfshinin mbështetje për proceset zgjedhore, zhvillimin e shoqërisë civile, forcimin legjislativ, zhvillimin e partive politike dhe promovimin e pjesëmarrjes së grave, të rinjve dhe komuniteteve të margjinalizuara në proceset politike dhe vendimmarrëse. Para kësaj, ajo shërbeu si zëvendësdrejtoreshë rajonale e IDK-së për Afrikën Qendrore dhe Perëndimore, duke menaxhuar një portofol të larmishëm të programeve të vendit në të gjithë rajonin.

Përpara se t'i bashkohej IDK-së në vitin 2002, znj. Freeman kaloi afërsisht 15 vjet me Departamentin e Shtetit të SHBA-së, duke punuar në seksionet politike, ekonomike dhe konsullore të ambasadave të SHBA-së në Tunizi, Maroko, Lesoto dhe Nigeri. Gjatë punës së saj në Uashington, DC, ajo shërbeu në Zyrën e inspektorit të përgjithshëm dhe Zyrën e analizave afrikane. Derisa ishte në Departamentin e Shtetit, ajo fitoi çmimet e nderit të merituar dhe atë superior të Departamentit, si dhe çmimin e analistit të dalluar. Zonja Freeman ka qenë gjithashtu një shkrimtare kontribuese për lirinë në botë, ku Freedom House ka botuar një studim vjetor të saj mbi të drejtat politike dhe liritë civile, dhe ajo ka shërbyer në cilësinë e vullnetares si zëvendëskryetare e bordit të zgjedhjeve për qytetin Takoma Park, Marilend.

Zonja Freeman ka një diplomë baçelor nga Universiteti Tulane në Nju Orlins, Luiziana dhe ka përfunduar studimet master në Universitetin Georgetown në Uashington, D.C. Përveç anglishtes që e ka gjuhë amtare, znj. Freeman flet rrjedhshëm frëngjisht. Ajo është nënë e tre fëmijëve të rritur.

 

Mari Yamashita

Përfaqësuese e Sekretarit të Përgjithshëm të OKB-së,

Shefe e Zyrës së OKB-së në Beograd

Mari Yamashita u emërua Përfaqësuese e Sekretarit të Përgjithshëm dhe drejtoreshë e Zyrës së Kombeve të Bashkuara në Beograd (UNOB) më 22 dhjetor 2020. Më parë ajo ka pas pozitën e drejtoreshës së Divizionit të Azisë dhe Paqësorit në Departamentin e ndërtimit të paqes dhe çështjeve politike dhe operacioneve të paqes (DPPA-DPO), zëvendësdrejtoreshë dhe drejtoreshë e Zyrës për mbështetjen e ndërtimit të paqes (ZMNP) dhe drejtoreshë e Qendrës së informacionit të Kombeve të Bashkuara në Japoni (UNIC Tokio). Shërbimi i saj me Organizatën përfshin mbi 30 vjet në diplomacinë parandaluese dhe ndërtimin e paqes në Azi dhe Paqësor, duke u fokusuar në përpjekjet e zyrave të mira në Fixhi, Myanmar, Nepal, Shiri Lanka, Timor-Leste ndër të tjera dhe në marrëdhëniet me Shoqatën e Kombeve të Azisë Juglindore (ASEAN). Në Afrikën Jugore, ajo mbështeti përfaqësuesit specialë të Sekretarit të Përgjithshëm për Angolën, Ugandën Veriore dhe Zimbabvenë. Si eksperte elektorale dhe politike, ajo menaxhoi mbi 20 projekte të asistencës zgjedhore në Afrikë, Azi, Amerikën Qendrore dhe Jugore.

Në terren, ajo ishte shefe e Zyrës së çështje politike në Misionin e Kombeve të Bashkuara në Nepal (UNMIN) (2010), zëvendëskryeshefe zgjedhore me Administratën Tranzicionale të Kombeve të Bashkuara në Sllavoninë Lindore, Baranja dhe Sirmiumin Perëndimor (UNTAES) (1996- 1997) dhe koordinatore e Kombeve të Bashkuara në Organizatën për Siguri dhe Bashkëpunim në Evropë-Operacioni i përbashkët i Kombeve të Bashkuara në Armeni (1994). Znj. Yamashita iu bashkua Organizatës në dhjetor të vitit 1990 si zyrtare e asociuar e çështjeve politike në Zyrën e Sekretarit të Përgjithshëm për kërkimin dhe mbledhjen e informacionit.

Mari Yamashita ka diplomë master në drejtësi dhe diplomaci nga fakulteti i drejtësisë dhe diplomacisë Fletcher në Shtetet e Bashkuara, dhe diplomë baçelor në drejtësi nga Jochi Daigaku (Universiteti Sofia) Japoni. Ajo flet japonisht, anglisht, gjermanisht, frëngjisht dhe ka njohuri bazike të gjuhës finlandeze. Është shtetase e Japonisë, është e martuar dhe ka një djalë.

     
     
   

 

   

 

   

 

>>>>Former SRSG's